Я видів царський сон, гіби зо мнов ся стріли

Англійська королева і руський президент,

Обама написав, в ООНі утвердили,

Шо стався унікальний в історії момент

Є Пудкарпатська Русь! Велика се держава

І будущеє буде майліпшоє для нас

Туй вшитко для русин, сьому народу слава

Дочекалися ледво, прийшов його нись час.

Типир не треба нич вже русинам робити

На зароботки нитко уже не буде йти

Опсталося лем нам ушитко поділити

А крумплі , жито , ріпа будуть самі рости….

Украйинци у нас лем як офіціянти,

У По̀ляні там шейхи ся куплють цилий динь,

У Берегсаз в басейн прийшли самі гавайці,

На Шипоті норвезьких я видів сто родин….

В ушитких русинів є хиже три етажна,

Машина , вертольот , в селі аеродром,

Усягди красота, аж позирати страшно,

І для «зелених» міра -літровоє відро.

  Народа я отиць, його любимий няньо

І пам’ятник робити уже ΄ми зачали

І щи за то , шо жити стало файно,

То имня Віктор первий нараз ми дали.

В Паланкови мій трон, в руках моїх криваня,

З трумбітами і в гатьох вояки там стоять,

І черес мавуть вни, на голові крисаню

А коло трону браття,сини ,невістки,зять…

Всьо буде як у сні, кіт наші всі русини

Мене протягнуть в Раду ,ну і братів в рокаш

Товди всьо буде нашим:долини, полонини,

І камінь на путьови тот тоже буде наш.